男人的耐性
Full-time湊B已接近一個月，Thx God 一切都很正常，很平靜，除了打針後有少少發燒，囡囡都錫住潮爸！人家見到囡囡咁「乖」，跟着就會講：「你就幸福啦，生個女咁乖......」聽到人家這樣說，自己不其然在想：「究竟是潮爸湊到囡囡乖？抑或囡囡本身乖，點湊都乖？」自己當然不敢領功，潮爸都相信在這個階段，小孩子先天帶來的要比後天的栽培多，因為後天都未真正栽培。自己能控制的範圍及作出的配套，都只局限於在家裡營造一個寧靜及舒適的環境，未喊之前換咗片先，攰就抱入房瞓...，肚餓就沖奶，及間中帶囡囡出街街見吓親戚朋友而已，都不能稱得上甚麼......
人家說小朋友越大，需要嘅嘢越多。首先就是attention，慢慢開始成日撩人玩，Ee Ee Er Er 引人哋；三個月大時，三分鐘都唔駛就食曬三安奶，而家會一路周圍望，一路玩個奶咀一路食。現在食4安奶差不多要10+分鐘，有時4安奶分兩三次先食曬。有時太太聽見食少咗，問會唔會唔夠？小朋友自己有個diet，夠飽就會lur返出嚟，最緊要check住身高體重比例正常就可以了。
4安食10+分鐘，真係少啲耐性都唔得。潮爸已經唔係啲「唔好急，但係一定要快！」嗰種人，盡量學習不偏不倚。但有時餵餵下，見囡囡停曬唔啜，又未用條脷推返個奶咀出嚟，照計又應該未飽，心都會諗：「可唔可以快啲！」有時做得routine work 多，會有一點不耐煩，唞大氣：「又要換片！」夜晚好攰時，sink盤仲有"九十幾"個奶樽未洗！ 可能有人會諗：係咪自己攞苦嚟辛.... 請個姐姐就攪掂，做乜攪咁多嘢？自己根本冇需要親力親為，咁麻煩做乜... ?
通常一有這個念頭，就會停一停，等一等，心想：「這是很正常現象/過程，對BB不能沒有耐性，仲有幾十年......而且只是啱啱開始！」阿Q精神又好，逆來順受又好，或者難能才可貴吧。也許這才是真正的Lifelong Learning（終身學習）。