https://www.facebook.com/babyandpapa/posts/263354430517320
喊聲 （呀嘩唔呀）
囡囡有個契媽，是典型的事業型女性，加埋入得廚房，出得廳堂，有些男士視她為競爭對手，有些則視她為真正賢內助。有一次契媽講：「我唔驚BB喊㗎！」在這世界上，大部分人都會「驚」BB喊，這種驚包括：驚BB唔舒服、驚嘈住隔離、覺得唔忍心、覺得好可憐、覺得心煩、覺得好亂、覺得忟憎.....總之想BB唔好喊。契媽可能有曬以上「驚」BB喊聲的免疫！
在囡囡出世前，有時都會問自己，如果第日BB喊咁點呢？應該點呢？自己有沒有上述的「驚」？其實契媽真的一語道破，真係「唔可以驚BB喊」。好多人聽到呢句說話，都會誤理解為「唔理BB喊」。重點係唔驚，而唔係唔去處理。
湊咗B一段時間，都大概知道BB點解喊。曾經有衝動想去買個BB喊聲翻譯機（幾千蚊HKD一部，唔知有冇人用過可以share下），但後來都冇買到。在這段期間，盡量去嘗試感受及理解在各情況，BB點解喊？現在有三種喊聲好明顯，第一種是呀呀...聲，第二種是嘩嘩聲，而第三種就是唔呀聲。
第一，當然係肚餓。囡囡肚餓係斷斷續續的「呀呀聲」。
最近同一個兒科物理治療師傾開，佢都好認同BB一叫肚餓，就即係「好好好好好肚餓」！頭幾聲係叫攞嘢食，如果大人recognize唔到或跟住先去沖奶，那BB就會好緊張，仲喊得大聲，眼有淚光，如果再無得食，就會由叫喊-->真正的哭泣，哭泣聲都真的幾可憐......跟着大人一般都一路沖奶，一路好緊張咁講：「得啦！嚟緊啦，唔好喊啦！」以為語言上同BB溝通緊，實際上傳送咗啲緊張的感覺比BB，BB就會仲喊大聲啲。無論細聲喊或大聲喊，囡囡肚仔餓就係「呀呀聲」。所以盡量較好時間，早少少沖定奶，在BB頭幾聲叫攞野食嘅時候就餵比BB食，BB食得開心，大人餵得放心。
第二，眼瞓。囡囡眼瞓係大力的「嘩嘩聲」。
有些人高估咗BB嘅Energy level，有些人卻低估咗BB嘅適應能力。BB人仔細細，metabolic rate（新陳代謝率）好快，隔兩日就會大個咗，有啲BB一個禮拜會重幾磅。但新陳代謝要用energy，喊要用energy，睜大眼仔望嘢、用力啜奶咀、用力吞、用力踢腳仔、伸懶腰、甚至笑，對BB嚟講都係消耗energy嘅事。所以帶BB出街，盡量避免long trip，去兩三個鐘頭，潮爸覺得係最Ok。如果BB去得街街耐或玩得耐，冇乜energy嘅時候又想玩，又唔瞓，就進入了一個又攰又瞓唔到嘅狀態，於是一返到屋企就會勁扭計，喊到拆天！現在就算在家或出街街，都大概計算BB的瞓覺時間。出完街街返屋企，見差不多時間瞓，一入屋就即刻抱入房，抹吓手仔腳仔即放落床，BB都會「嘩嘩聲」，但唔駛5分鐘就瞓着。
另外，其實BB的適應力好強，譬如之前New Born，孭住個BB籃，BB就去到邊瞓到邊；大個啲，在孭帶瞓着，去到邊都瞓得着。在家裡，無論手抱住、在大人張床、BB籃、Baby sitter balance，理論上BB都瞓得着，視乎習慣怎樣build-up...... 最重要就係在BB要瞓的時不要distract佢，同埋BB瞓覺及醒來最好是同一個地方，多啲安全感，那BB扭眼瞓而喊的情況就少好多。
第三，扭計/扭抱。囡囡扭計時係好用力嘅「唔呀聲」。
好多人最攪唔掂就係呢個！一講呢個情況，大部份人都會只著重現在式，但其實係要睇過去式。 In general，每個人都想人抱，每個人後天都會形成習慣，習慣突然間唔同咗，好唔慣。潮爸及太太不會常常抱BB，因為親戚朋友上嚟及出街街都抱好多。有時食飽，瞓飽就會好用力咁「唔唔呀呀聲」，谷到面仔都紅曬，就知扭抱。那就坐在床邊講吓嘢，傾吓計，比返啲attention BB。抱得太多習慣咗，突然冇得抱，聽有啲朋友呻BB由朝扭到晚，由晚喊到朝，大家都辛苦。
自己都是嘗試從不同角度去揣摩BB嘅需要，嘗試做一部人肉BB喊聲翻譯機，在BB未識講話之前，這部機都會在不overloaded的情況下繼續運作。
寫完呢篇《喊聲 （呀嘩唔呀）》，上網再search，原來有個iPhone App 叫Cry Translator，啱啱download 咗，試緊......
Anyway, 大家不妨試下心水清啲，不要太focus，抽離一下，從旁觀察下，聽下聲，說不定有意外收穫。