唔輪到你揀
今早好忙，BB一起身就流曬汗，BB好多頭髮，濕到好似洗完頭咁，墊在背脊的毛巾仔都濕透，尋日着咗長褲仔瞓，脾仔濕曬，整體嚟講，成身濕曬！抹頭、抹身、換衫、換褲、順便換埋片，一攪攪半粒鐘...... 換完片又嗌肚餓，那就餵埋奶。攪掂曬，BB好開心，咁啱BB媽咪打電話嚟，BB就望住個電話然後「卡卡卡卡」咁笑，跟着又Ee Ee Er Er 好似想同媽咪講，我換咗衫，食咗奶，好Happy 呀！之後同BB玩咗一陣，玩到攰就瞓。做BB真過癮！
跟着洗奶樽，洗洗切切準備午餐（...今日唔得閒食早餐），再準備好文件帶BB晏啲去pick up 護照...... 做曬啲嘢之後，才發覺自己原來未洗面刷牙，那就拿拿臨攪掂佢。在一路刷牙一路諗：「唉！有好多嘢真係唔輪到你㨂！」尤其在BB出咗世之後......
之前屋企得兩個人，鍾意煮飯仔就落去買餸，二人世界玩煮飯仔，即席整燭光晚餐都得；開電視就開電視，整2 sets天王椅諗都唔駛諗就坐落去，開電腦播歌就播歌，鍾意幾點沖涼都得，去街鍾意著咩衫就着咩衫，樣樣都可以想點就點...... 但BB出咗世之後，一切都要以BB為先。有好多人都怕生完後生活習慣及質素會改變，潮爸可以肯定答「係」！但習慣，其實每個人的習慣都可能不斷在改變，隨着年紀成長，身體狀況影響，搬到別的地方，人生階段不同，習慣也不同，所以這可不必太擔心；而質素的高低，就視乎自己的做法。
要湊BB，一定用很多精神與時間去照顧，有時真的沒有精神同mood去煮飯，要很多方便法去配合。現代人都比較遲婚和遲生，不能再好像十八廿二咁生活 -- 捱夜捱餓不斷向前衝！否則疲於奔命或生起病來，結果事情到頭來因快得慢。而家開始，盡量少開電視，第一，屋企靜啲，第二，其實真係冇乜嘢好睇。而家如果囡囡在自己張床瞓緊覺或自己玩緊，都會隔10-15分鐘入去望吓。煮煮吓飯要望吓，睇睇吓書要望吓，做2 sets 天王椅，做完1 set 都要入去望吓。開電腦睇片都戴Ear phone ，講電話會細聲啲。自己早啲或夜啲沖涼，而幫BB沖涼先然後等BB瞓先。去街街因為用孭帶孭BB喺前面，所以唔可以著啲前面有拉鏈及鈕扣嘅衫，因為會整襯BB頭仔。所以話，真係唔輪到你揀。
如果想有得揀，好簡單。好似尋日潮爸要考試，有啲家務無時間做，那就先用咗做家務同洗奶樽嘅時間去溫習，考咗試先。但考試返嚟已經攰到癲咗......潮爸一般都唔會留啲碗隔夜，但尋晚真係唔得，碗都冇洗就瞓咗。想有得揀就係再付出更多努力、時間同精神，要做的始終要做，所以瞓醒recover咗之後，第一時間就係洗咗啲碗先！