https://www.facebook.com/babyandpapa/posts/264174800435283#mctmp
照顧人 vs 照顧自己
每逢有friend失戀搵潮爸傾計，潮爸都好耐心聽他/她們傾訴，做一個聆聽者。讓朋友抒發完內心的悲傷，數清對方的不是，發洩完忍咗好耐嘅情緒，就盡量就其需要，說些安慰的話，希望他/她們可快一點從「唔慣」走返出嚟，由觸境傷情，而變成事過境遷，快一點走向人生另一條路。失戀時好頹的人都有一個共通點，就是對對方太好，冇照顧自己。
常常聽很多Daddy媽咪說，要比「最好」自己的子女！但這兩年已經改咗口，大家明瞭到，「沒有最好，只有更好」。在年青時同其他早婚及已有子女的朋友交談，講吓講吓，話題都一定會講到子女，臨傾完之前，都總是呢一句：「你第日做父母你就明嘅啦！」記得以前有一次見個同事披頭散髪返工，大家問佢做咩事，她緊張說：「要照顧小朋友呀嗎！邊度仲有時間打理自己唧？」有很多人都會「瞓曬身」去照顧小朋友，忘了留空間給自己，或者留很少時間及空間與另一半相處，任何時間都三人世界，四...人世界。但無論怎樣都好，最緊要工作上及家庭上一切協調。
而家一至五喺屋企，除咗照顧BB之外，首先學多咗就係照顧自己。因為BB食完奶，換完片，玩完，每日加加埋埋大概要瞓十幾個鐘，自己的起居飲食，早午晚三餐都要諗，其餘時間唔係休養生息，就係做家務。照顧屋企多咗，知道啲嘢放喺邊，例如：洗奶樽洗碗唔洗講，廁紙用曬換廁紙，洗頭水用曬refill洗頭水，啲碗乾咗就放返入碗櫃，用除塵紙掃地，係咁易抹下個雪櫃，摺吓衫，執吓書架...... 等等，加埋平時煲開代茶，整吓豆漿及果汁，時間過得不快不慢，剛剛好夠用。另外，晚上太太回家，潮爸就當然沒有像電視劇般又遞拖鞋又揼骨又問今日返工點呀？ 潮爸通常即刻抱囡囡比太太，跟住她倆就自由活動。而潮爸就有一刻free，那就準備一些自己工作上的東西。跟住太太就出嚟講吓返工的趣事，好似小朋友放學返屋企急不及待講比Daddy媽咪聽返學發生的事情咁。傾下講下，咁又一晚。切記不要帶工作上的壓力回家釋放。
其實在人生每一個階段，學會照顧人同照顧自己都好緊要，因為攪得掂自己，才有空間與身邊的人分享其他東西，喜歡照顧別人的人，也不要忘記照顧自己。