https://www.facebook.com/babyandpapa/posts/264457143740382
予欲無言
囡囡由上個月開始，已經好多嘢講，可以一次過不停咁Ee Ee Er Er 分幾鐘，一路講，一路好肉緊咁郁手郁腳，好多不同的表情，尤其在晚上，BB媽咪返嚟就會勁講，好似在話比媽咪聽整日發生過啲咩咁。（有用手機拍片，file size 好大，見到面先比大家睇）
睇咗嘅朋友一定會講，呢樣嘢好似潮爸潮爸十分驚嚇 原來潮爸在各人心目中，係一個講好多嘢嘅人！說話有如滔滔江水，連綿不絕..... 唔好啦掛，俗語有話，言多必失，可能已經得罪咗好多人，sorry sorry。 諗返轉頭，「多嘢講」都係事實，由中學比人話講嘢好慢，到後來比人話講嘢太快。以前就多說話，多做事，但到咗現在一把年紀，真係要切切實實去，少說話，多做事。這是其中一個有「潮爸湊B日誌」之原因。
俗語話：「三個女人一個墟。」 以前都信，但實際經歷比較少。因為通常跟女性朋友食飯，都是比較人少，兩三個去下西餐廳或素菜館或X記甜品...，唔想咁多人好似應酬式咁，同埋少人啲先真係傾倒嘢，share吓生活上嘅嘢。有時一大班人聚會，同幾個朋友食飯傾計，性質係好唔同。
而一班男仔Friends出去，男孩們都應該好認同，真係出嚟「吹水」，聽落好似好無聊，但又好enjoy 吹水。咁當然不是無聊，其實男孩子的友誼，就不知不覺地在美其名「吹水」而實際是極具內涵中建立！
人大咗，各有各忙，無論在工作上或家庭上要處理的事情多咗，要為生活及事業奔波，要去旅行（get away from the city as well as the pressure）男女亦然。有時約咗個朋友，either side突然有事唔得閒，再下一次約或許已是三個月，半年甚至一年後的事。反而有時friend從外國返港，還比較容易約。好的朋友，必想多聚。很懷念年少時，中午一撥個電話，晚上就在Neway CEO見，多麼的即興，多麼的精彩。
之前太太未返工，潮爸外出工作很忙，朋友想到來家裡探囡囡，都因為自己不在家而擱置。現在一至五在家，約朋友到來，朋友唔嫌遠或唔怕聽日要早返工，就會過嚟聚一聚，反而更容易重拾少年時的感覺。有時都知自己咩事，多嘢講到令到朋友夜咗走，所以真係唔講咁多，留返第日囡囡講。