https://www.facebook.com/babyandpapa/posts/266046920248071
我有戶口啦！
好多人除了幫小朋友買教育基金外，都會幫小朋友開個戶口儲錢，將所有人封比小朋友的利是存曬入銀行，等第日大個攞嚟用。潮爸覺得開個銀行戶口都好，但教育基金就要Check吓啲plan先，比較一下，不能輕舉妄動。
潮爸帶囡囡出街，都保持一貫作風，會等熱頭落咁啲先出去。但銀行五點關門，所以無計，唯有盡遲，4：30pm 要落去。去到銀行，無乜人，Thx Thx! （可能因為就嚟關門），坐房仔啲哥哥姐姐見到潮爸+囡囡，馬上上前招呼。潮爸早有準備，帶曬出世紙、身份証、護照、...身份證影印本、地址証明，同理最緊要嘅「錢」落去開戶口（囡囡啲利是錢），因為人生第一次攪小朋友戶口，乜都唔識，原來小朋友戶口都有曬外幣，網上理財，電話理財等所有功能，係一個與大人一樣的綜合理財戶口。一路等，囡囡等到唔耐煩，又Ee Ee Er Er...... 「好悶呀！」
等到差唔多五點，啲人都走曬，哥哥姐姐收咗工，就行過嚟同潮爸打招呼。有位個樣睇落都頗後生嘅Sales姐姐，話佢個女已經讀緊小學，仲同潮爸呻佢小朋友讀幼稚園年代冇學券！傾下傾下，等下等下，已經一粒鐘。囡囡越嗌越大聲，成間行都冇曬客人，裡面啲staffs聽到叫喊聲都走出嚟睇下咩事！啲文件終於攪掂，可以行Counter入錢。啲Staffs埋完數，企曬喺同一個Teller後面同BB打招呼，傾計。Teller哥哥大讚囡囡好乖，等咗個幾鐘都無扭計。
Teller哥哥等override過機嘅時候，遞張提款咭比潮爸。潮爸不其然有一份感動，馬上想：「囡囡可以理財.....唔知第日大個條路係點呢？並想起在利是封上各親戚朋友給與的祝福...... 」，跟住同囡囡講：「囡囡一陣自己出去㩒機啦！」攪掂曬啲嘢，順便叫個Sales哥哥print埋個教育基金Plan返屋企研究下....（已研究咗，唔係好吸引，睇多幾間先）返到屋企都成6：30 pm，原來攪咗成兩粒鐘！開個戶口真係唔容易。