https://www.facebook.com/babyandpapa/posts/274468782739218
剪臍帶
唔知幾時，醫院開始可以比爸爸剪臍帶，寓意住爸爸帶BB嚟這個世界。入產房，見到血，同埋見到+聞到那些好核突的東西，雖則話男人要天不怕地不怕，但去醫院聽產前講座時，姑娘都一而再，再而三咁提醒，叫啲準爸爸唔好逞強，唔好死撐，唔掂就出聲。因為姑娘們都試過好多次，啲準爸爸入到產房，突然間唔出聲，面都青埋，然後無啦啦轉身向住道牆。跟住姑娘本來只需照顧2個，變咗照顧3個！
生產
去政府醫院生，除非有特別情況或特定要求，否則都鼓勵順產。BB出世前一天，潮爸陪太太入產房。熄曬電話，所有electronic嘅嘢都唔可以帶入去，有種入咗一個密室（好似玩逃出香港咁）的感覺，淨係有張床同有啲儀器喺裡面。醫生和助產士為太太打催生藥，之後醫生就離開，每四個鐘先返入嚟睇下下面開咗幾多度。要十度先至叫開曬，BB的頭仔及膊頭才夠位出到嚟，唔夠仲要「剪」！ 助產士間中會入嚟睇下媽咪同BB心跳正唔正常，及駛唔駛加催...生藥。催生藥的效用只是for Induce Contraction，下面都唔一定開。
頭嗰4個鐘都冇乜動靜，淨係一路慢慢滲緊羊水。咁多個鐘，姑娘在中段放潮爸出去食飯，而太太就冇得食，又冇得飲水。問助產士攞過ice-chip，結果都冇攞嚟。潮爸出到去就勁覆Whatsapp，因為大家都好擔心，覆Whatsapp+覆電話報告消息，都覆到無電！喺醫院Canteen食完飯，就急急腳上返去，著返套套裝，入返產房。在產房齋等，潮爸見無嘢做，就攞本書入去睇，點知助產士無啦啦熄曬啲燈，話調暗啲啲燈光，等太太舒服啲。過多4個鐘，太太都仍然冇乜動靜，太太淨係話好肚餓同好口渴，但都冇法。8個鐘，潮爸只在產房與太太傾計，諗下BB改咩中文名，同埋在這150sq ft嘅「密室」裡蕩來蕩去......
之後嗰4個鐘，戲肉嚟嘞！醫生入嚟，見下面仲未開夠，於是整到漏多啲羊水，並加更多催生藥！那太太就開始feel到好勁嘅Contractionsssss! 每一下Contraction，太太都話好痛，但因為8-9個鐘冇食過嘢，都已冇乜力去抵禦那些痛楚，只有吸笑氣來止痛！吸笑氣時，要呼曬才可把笑氣罩取開，否則潮爸及助產士都會吸埋啲笑氣！見到太太都攰到咩咁，又痛到咩咁，但係都未生得！潮爸只有在旁叫太太：「吸氣.......呼氣......」又過咗兩粒鐘，突然間聽到隔離房個媽咪「嗌到拆天！！」雖然隔音已好好（肯定好過啲卡拉Ok房），但那邊的媽咪及助產士實在嗌得好大聲！隔離媽咪：「呀呀呀......EEEE...呀！！！」而助產士仲大聲：「推呀推呀推呀推呀推呀推呀推呀推呀......吸氣...推呀推呀推呀，用力呀！」潮爸及太太聽到毛骨悚然，毛管都豎起及打曬冷震！淒厲嘅叫聲持續咗大概半個鐘後，來了一份寂靜，就知道那邊BB應該已出世，霎時間，戥他們有一種莫明的歡喜......
那邊廂已攪掂，這邊廂之後怎樣呢？明天繼續