https://www.facebook.com/babyandpapa/posts/280286705490759
男人的身分
早前睇完港台節目「湊仔公」，兩個爸爸都像潮爸一樣，全職湊B。在節目中，討論「男人的身分」這個問題。之前《男人的角色》係講男人在家庭裡的位置，而講到身分，就是社會點樣睇湊仔公，及湊仔公點睇自己。
在節目中，其中一個爸爸話：「住家男人豬腸粉。」成個社會，其實還未能接受一個爸爸全職湊B，有啲人會假設那個爸爸有問題：係咪有病？係咪冇工作能力？係咪搵唔到工？係咪搵唔到錢？有啲人會determine咗那爸爸的性格：一定係老婆奴！一定係好內向！一定好怕事！一定好像豬腸粉咁...「淋遮遮」！成日都話一樣米養百樣人，真係要搵到一百樣人先有得講。
之前同太太研究點樣湊B，潮爸都問太太怕唔怕輿論壓力？現在在香港，其實人們都比以往開通很多，但偶爾太太話比人聽潮爸湊B，都會O曬嘴！又會話男人一定湊唔掂！睇完那港台節目，其實在理念方面，潮爸與那兩位主角的想法都幾一致:
1. 就係生完BB，無啦啦請個自己唔識，而又溝通唔到嘅外籍人士湊，仲要基本上成個B比曬佢，諗落都有啲擔心。
2. 初頭嗰一個月，BB兩個鐘頭食一次奶，或者半夜唔瞓，夫妻就take turn去抱住BB。(遲啲同大家分享）
3. 小朋友在扭計，佢哋內裡已有好多負能量，我哋（父母）更加唔可以再比負能量佢，而要付出更多正能量幫佢哋舒緩。
4. 買餸煮飯，照顧小孩，照顧太太都係自願，無得迫。
5. 自己的身分要好清晰，自己做咗嘅嘢，將來都係小朋友得益，世俗眼光，要自己調節。
其實潮爸覺得，一個人在社會的身分及位置非常重要。在中學時代，學校都常常強調self-esteem、自我價值、自我尊重、自我肯定等等，來到要全職湊B這一刻，所有這些功夫就返曬嚟！持續湊B，其實好像另外開一度門，從另一個channel更加了解自己。
除了理念一致之外，潮爸亦覺得，潮爸與節目裡的兩位主角都有共同的條件：
1. 鍾意湊B （會睇育嬰書）
2. 在不斷學習 （照顧人 vs 照顧自己）
3. 平日湊B + Weekend 返工 （Production 形式改變）
4. 有個明白事理，處處包容的太太
由朝到晚睇住囡囡，都沒有missing甚麼，但有時都覺得囡囡突然間長咗（高咗），大個囡咗。一路湊，一路去肯定自己的身分，那就是不折不扣的「潮爸」!