https://www.facebook.com/babyandpapa/posts/283545611831535
剪指甲
現在囡囡已經六個月，六個月以來，每次幫囡囡「剪指甲」都動魄驚心！
BB剛出世，最着重都是餵奶同埋著得夠唔夠衫，加上冬天出世，着夠衫就更加緊要。大人亦要好好保重自己。第一，自己病又要睇醫生，又冇得抱BB；第二，太太如果病，要食藥，好可能醫生就會建議唔好餵人奶，雖然呢個情況可以處理，但都幾麻煩。BB大個啲，另外一樣都幾緊要，就係剪指甲。出世個幾兩個禮拜後，有一天早上餵囡囡，突然發現，有三條好長好深既紅色痕喺塊面度，就係BB自己用隻手抓面。雖然BB新陳代謝率好高，...但隔幾日就成塊面花曬，見到都肉赤！影相又唔靚靚，抓得太深又會發炎。
有朋友都送咗個嬰兒指甲鉗比潮爸，第一次膽粗粗同囡囡剪指甲，太太抱住，伸BB手仔出嚟，睇落唔係隻隻都咁長，於是淨係剪特別長嗰一兩隻。剪隻手指公時，因為啲指甲好貼啲皮，剪咗兩下諗住停，唔知點解諗住停無啦啦會剪多咗一下，剪到流血添！估唔到囡囡出世兩個禮拜就見紅 ！但囡囡好叻叻冇喊。好彩唔係剪得好深，隔兩日就已經好返。不過潮爸都有少少驚，於是大部分時間都係戴住手套仔，淨係沖涼先除手套。
因為成日都戴住手套仔，唔係好覺啲指甲越嚟越長。又隔咗兩個禮拜再睇，原來初生BB啲指甲生生下就會捲入生，生到好似封咗個口咁。伸返平啲指甲，原來已經好長。於是潮爸就同太太商量，除了用指甲鉗，仲有冇其他辨法？
翌日，潮爸就行落樓下BB舖，睇下有冇啲咩新嘢係for BB剪指甲。
潮爸問Sales：「請問有冇BB剪指甲用品？」
Sales：「喺曬度，自己睇。」
潮爸睇咗好多隻牌子，問：「$70嗰隻指甲銼同$40嗰隻指甲銼有咩分別？」
Sales:「$70係台灣出，$40係美國出。」
潮爸懷疑地問：「啲指甲銼同大人用嗰啲一樣咁大支，係比BB用㗎？」
Sales：「個個都係咁用㗎啦！$70嗰隻多人買啲.....」
接着就收到太太電話，話早前婆婆買咗一set，可以用住先。潮爸回家，唯有膽粗粗再試剪，上次用指甲鉗鉗到流曬血，今次先試下用指甲銼，但原來指甲太軟，銼唔到。於是試下用較剪仔剪。不試由自可，一試原來較剪係最好用！用較剪真係得心應手，鍾意點剪就點剪，剪半隻指甲再剪半隻又得，剪完前面再剪起角位又得，簡直perfect！通常啲人都話BB瞓緊覺嗰陣剪，但潮爸同太太都試過，好易整醒BB同埋唔就手；平時醒住咁剪，手仔不停咁郁，根本都剪唔到。最後太太用一個最潮嘅方法，就係去完街街，未除孭帶之前剪咗先。BB喺孭帶向住外面望嘢，手仔方向剪指甲又就手！好快就剪完BB指甲，剪埋BB腳甲都得，大家不妨試下。