https://www.facebook.com/babyandpapa/posts/293488140837282
有女萬事足
首先在此多謝各位讀者支持，開版兩個半月，已經超過1100 Likes ！承蒙各位厚愛及鼓勵，今期其實應該係「有'Likes'萬事足」。潮爸會繼續努力，將一些切身的湊b經歷及經驗而累積的心得，真真實實地與各位分享！
顧名思義，有女/仔萬事足，就是有咗BB後，淨係掛住理個BB，其他人或事情就好少理。生咗囡囡後，有好多人都陰陰嘴笑，然後帶少許諷刺地潤潮爸：「吓！湊女呀？睇你個款，都係啲有女萬事足嘅人啦！唔好淨係識顧個細，要理埋個大呀！」聽落去，潮爸立即想起粵語長片，...嗰啲「要仔唔要乸」嘅場面及對白。上幾代文化不及現代那麼進步，男人娶咗個老婆無得生，可以名正言順休妻；好耐都冇得生，又話老婆個肚唔爭氣；生極都係女，又會話娶個妾侍返嚟生...... 但自從生物學普及化之後，有冇得生，好大機會係depends on個爸爸，生仔生女，直情係fully depends on個爸爸。突然間爸爸好像冇曬藉口，要無奈地面對現實。潮爸都很清楚飲水思源的重要性，有太太，才有BB；有上一代，才有我們這一代。
幾個月前認識咗一位爸爸級，他是非常的「有女萬事足」。唔知他有否睇潮爸日誌，但有睇並給他知道都不怕，因為他也直認自己錫到個女燶！那時候BB都未出世，他問潮爸：「你老婆照咗超聲波未？知道仔定女未？」潮爸答道：「西醫照咗係女，中醫把脈係仔。」爸爸級滿有信心地回應：「實係女啦！」續道：「生女好呀，又易湊！你做完成日嘢返到屋企，個女撲埋嚟叫你，爸爸...爸爸，嘩！冧死！」跟住就比佢個女張相潮爸睇：「肥嘟嘟，係幾得意喎！」跟着見到姐姐帶佢個女出嚟，那爸爸馬上飛奔上前同個女玩，那一刻，即刻上演一幕現場真人版嘅「有女萬事足」。
潮爸覺得，BB真係好得意，手仔腳仔頭仔身仔腳趾仔肚子鼻仔口仔，總之就成個都係一個人仔，無咩人係唔鍾意BB。小朋友，自己唔識照顧自己，真係需要好多attention，但其實身邊其他人都要關顧，上一代、兄弟姐妹、朋友、同事... 如能平衡各樣，那生活必定會更精彩！