https://www.facebook.com/babyandpapa/posts/296388467213916
食糊仔 • 續
而家基本上日日都有餵BB食糊仔，母嬰健康院建議每日在餐與餐之間餵糊仔。試咗，其實原來都有啲難度。
第一：BB有時食嘢嘅份量都唔係太穩定，有時餵完兩匙羹糊仔，再餵奶，想餵多3oz，但食咗一安就唔食，變相嘥奶。
...
第二：有時間夾唔啱，通常係出咗街街或者瞓咗覺，好容易會miss咗。
所以要在餐與餐之間加嘢，確實有啲技巧，同埋feeding schedule及生活節奏一定要好穩定。
除咗餵糊仔，有啲人鍾意餵蘋果和香蕉等，潮爸就會餵潮爸至愛嘅牛油果比囡囡食。囡囡勁鍾意(same taste)！呢兩日太太放工返嚟都有提到，在泵奶房識咗幾個志同道合嘅媽媽，話佢哋次次買襯牛油果，都係硬到挖唔到比BB食，自己又食唔到，於是就無再買，並問太太怎樣揀牛油果？有些少心得，可以同大家分享一下：揀牛油果要揀一些皮已經變深綠色，攞上手，手指公用力按落去，淋淋哋，再睇下個頂有冇爛，無就即係即刻食得。 （唔好揀啲皮好靚淺綠青色皮嘅牛油果，如果唔係有排都未食得）
牛油果好處：含豐富Omega-3s有幫腦部發育，唔甜，有少少味及糊仔texture，易入口。
潮爸唔鍾意嘥嘢，亦都要將囡囡的生活融入自己的生活中，所以基本上囡囡食嘅嘢，我哋自己都會食。前幾日整咗紅蘿蔔牛油果糊，用德國寶將已煮熟嘅紅蘿蔔加埋牛油果打成糊，再煲返熱，未落味之前裝定兩碗比囡囡，淨返個啲，落味，落糊椒粉，加啲橄欖油，就成為一碗好美味的紅蘿蔔忌廉湯！另外，之前唔食嗰啲蘋果糊，已經混在米糊內餵咗比BB食，遲啲就會逐樣加。唔好比BB一兩次唔食就被打跨，BB口味期期都唔同，各位不要氣餒，做出多元化的配搭，令BB健康，自己又更健康！！
太太語錄：有時餵糊仔，BB會以為同佢玩，Puuuu Pu曬出嚟，將食嘢放咗入口後，隻匙羹放喺個口耐啲，咁BB就知道係食嘢，唔係玩㗎啦！