https://www.facebook.com/babyandpapa/posts/298089453710484
新車落地
囡囡而家大個咗，第一，越來越重；第二，越來越坐唔定；第三，係時候學習自己坐定定玩。所以潮爸及太太商量，係時候攞架BB車出嚟。早前朋友讓咗架BB車比潮爸，那時候都未係潮爸，由朋友家攞住架BB車坐巴士回家，感覺有點怪怪的，但而家做咗潮爸後就自然好多。架車車攞到返屋企，那就立即清潔一下，然後試下開，點知唔識開！試咗一陣，都係唔識，於是就放埋咗一邊......一放就放左八個月。
其實從初期太太懷孕開始，不時行商場都會睇下啲BB車，唔係太重，就係太貴。Price rang...e 由$400 -- $20000+，再貴既都唔駛講。大多都偏笨重，在外國就啱用。住在香港，除非自己有車，如果唔係都好難攪。如帶BB出街街，去遠少少，坐地鐵坐巴士都幾麻煩。看見人家推住BB車等電梯落地鐵，幾有耐性都等到躁底！ 唔摺BB車唔上得巴士，就算摺咗車，架巴士人少都無所謂，人多要人家讓來讓去，都好唔好意思。
有見及此，潮爸問定曬啲媽媽級，幾多個月大，咩size嘅BB先可以坐士的車 (Umbrella Stroller）：「六個月都已經得，不過唔好坐咁耐（睇住條腰，可能唔夠力），同埋小心如果BB郁得太犀利會好易反車，仲有唔好掛背囊等重嘢喺架士的車後面。之後決定去玩具反X城買部士的車先，因為夠輕及size細，帶出街方便啲。而潮爸及太太最concern就係BB車不能太重，萬一太太攞唔起上巴士或者上的士，或整親手腕，手尾仲長。去到反X城，都有幾種士的車，全部都是六個月至兩歲半適用，潮爸當然試曬（Test Drive，好似去車展試車咁）。有一隻BB坐咗會凹咗落去，有隻個輪唔係太順，有隻摺起咗啲螺絲刮手，最後揀咗部紅色車車（紅色的Ben跑）。（條安全帶穩啲，但要買條安全帶套，有少少揩住條頸））
一坐落去，囡囡好唔慣而且即喊，但太太推住車車係反X城兜咗個圈，覺得勁好玩。咁唔駛再諗啦，即刻排隊比錢。跟住推落商場，囡囡好緊張，握實曬個拳頭仔，不嬲出到街就勁拍腳，即刻唔敢郁。之後潮爸就同太太去食哈X大雪糕，推到落商場地下，囡囡已經瞓咗。
潮爸現在已習慣推囡囡坐Ben跑落商場，及用孭帶孭住BB，然後攞住Umbrella Stroller坐巴士及地鐵，真的非常方便。人家見到囡囡咁細個坐士車問得唔得？那潮爸就將之前媽媽級已比咗寶貴的意見轉述。另外潮爸覺得用車真係要小心，去商場要小心撞到其他小朋友，上落膊位及落扶手電梯要向後落，唔好推太快，過馬路握實BB車（唔好掛住傾計），買嘢唔好將BB及BB車unattended（小心比人推咗去），有時太太都會提醒。推架BB車都咁唔簡單。所以，學問真的是學不完。