https://www.facebook.com/babyandpapa/posts/318306451688784
氹婆婆
早兩個月（囡囡仲係六個月），婆婆在某酒店的貴賓房，擺了兩圍，與自己家人一齊慶祝七十有一，順道與親戚朋友聚一聚。出席大場面，潮爸一家當然盛裝赴會，而囡囡梗係著返件紅色花花裙去賀婆婆的大壽 。
之前一日同囡囡講咗話婆婆第二日大壽，等囡囡有個心理準備。到咗當日，一心諗住等囡囡下午瞓多啲，瞓夠就夠精神出去同人玩。唔知係咪興奮得濟，由朝到晏晝都唔瞓，到咗差不多5點鐘，撐唔住先瞓。但潮爸打算6點半鐘出門口，由屋企搭車去酒店要at least 一個鐘多啲，加上出街街前要食曬及換囇片先出得門口，咁囡囡大概得返45分鐘至1個鐘瞓。那潮爸心諗：「大劑，沿途又未必瞓到，去到酒店實喊！」不過都冇辦法，潮爸晏極都要6點鐘嘈醒囡囡，攪掂曬就出門口。
途中有少少塞車，去到都差不多8點。婆婆見到囡囡好高興，打緊麻雀都即刻起身過嚟抱囡囡。但囡囡可能未去過那家酒店，加上攰攰地，即刻爆喊！ 婆婆都很明瞭，BB可能怕生保，所以等囡囡喊完，收咗少少聲，先抱囡囡過去玩。
囡囡整晚的狀態都麻麻地，開席前影集體相都一路喊緊。差唔多到9點幾，食咗奶，並熟習咗環境，先至Ok。姨婆們見囡囡開始Ok，就放低曬筷子嘢都唔食住，立即過嚟抱囡囡：「趁BB唔喊快啲影幾張相先！」囡囡可能知姨婆錫錫，都好合作，影咗幾張望鏡頭嘅相交差。之後大家逐一與婆婆祝賀，敬完酒後婆婆就一直抱住BB。
本來簡簡單單一家人食餐飯，有個高潮位！就係臨尾食壽包時，婆婆見囡囡嘴郁郁，就問：「囡囡係咪想食壽包呀？」那婆婆就遞個壽包埋BB個嘴度，點知囡囡用條脷勁䑛，仲要䑛到嚼嚼聲！然後大家就好高興，囡囡都食壽包嚟賀婆婆大壽。那婆婆就好開心，直到散席都笑到見牙唔見眼，又不停咁錫囡囡。氹到婆婆勁開心！
囡囡有咁多人錫，潮爸真的要幫囡囡感恩。