https://www.facebook.com/babyandpapa/posts/318517175001045
日程表 update
現在囡囡8個幾月，已經好似好大個，一起身就喺自己張床玩，潮爸及BB媽咪起身就望吓我哋，笑吓，跟住又繼續自己玩。聽落好似輕鬆咗？等潮爸再update一下日程表。
早上7點，太太就已經起身泵奶，跟着潮爸就8點起身餵第一轉奶。成晚咁長肚空空，呢一轉BB有時食到六至七安。BB在未完全醒曬嘅情況下，已經食完，換咗片片，跟住又好舒服咁瞓返。太太泵完奶，以極速變身為OL（襯衫+makeup+gel 頭+著靚鞋+執泵奶袋+食維他命C -- 做泵奶媽都要顧及形象！），就急急腳趕返工。有時雪櫃有自家製果汁、黑豆漿或羅漢果水，太太就從雪櫃攞樽飲品，即閃！潮爸同太太打個招呼後（Hi...bye...），就會做自己嘢，例如：瞓返。囡囡大概十一、二點到再起身，同BB玩一陣，又係時候餵第二餐奶。
而家餵奶有些少難度，因為大個囡咗，除咗朝早同半夜嗰餐，食到最尾嗰兩安，就開始玩奶樽個奶咀。推返個奶咀出嚟，跟住又啜幾啖.... 玩下玩下，有時玩成十分鐘。潮爸見狀，以免囡囡玩到啲奶周圍都係，見囡囡推返個奶樽出嚟，即刻放平個奶樽，等啲奶唔好漏出嚟，見囡囡啜返時，即刻倒返直個奶樽等啲奶流返落去。正如《一代宗師》話齋，兩個字一「橫」一「直」，不斷地橫橫直直，好不容易才乾乾淨淨咁餵完支奶。
中午過後，潮爸either煮午餐或者落街食。落街食，囡囡就好開心，因為有得出街街。一去通常兩粒鐘，因為要買埋餸，有啲超市買，有啲街市買，有啲有機店買，務求做到精打細算！俗詞云：「做大事，不拘小節。」係啱既！但做小事：「精挑細選，考考功夫？」
推住BB周圍去，街坊見到BB都好開心，見得多，同啲街坊都熟曬。返到屋企，抹下面仔，手仔，腳仔，放喺Baby sitting balance，潮爸就會餵餐糊仔。餵完，換返瞓覺衫，又放返喺床仔玩。囡囡有好大嘅自主權，鍾意就玩，鍾意瞓就瞓，潮爸都沒有干預。只有太太千叮萬囑，有一樣嘢唔懶得，就係一定要換返「瞓覺衫」先可以放返落床！
一日嘅時間已過咗一半。如果晚上喺屋企食，潮爸會開turbo即刻準備；如果太太一天辛勞後想出街食relax，潮爸會多餵囡囡一餐before heading out。食完晚飯返嚟就餵多轉糊仔。另外潮爸現在刻意build-up一個習慣，就係盡量食完奶先幫囡囡沖涼，沖完涼就瞓，準備定第日囡囡唔駛要抱住支奶先肯瞓。（白紙地方就在此）
囡囡瞓咗，太太泵完最後一轉奶瞓埋，潮爸又係時候做大清潔，將一天用完的奶樽及奶泵清洗乾淨，放入烚奶器內烚好，明天又是新的一天......
生活的點滴，一天一天的累積。一日復一日，如果每天都update，每天都珍惜，會否在極速飛逝的時光中，留下點點的記憶的唯一竅門。