頭盔
自從囡囡識爬及自如地轉身之後，潮爸見囡囡喺床仔都成日撞來撞去，有時會撞到喊，有時會撞落自啲玩具度，有時同囡囡喺大人床度玩，爬下爬下，一野就撞咗落潮爸度，唔好講笑，都幾痛！但這都不能驅使潮爸買頭盔比囡囡。
直到有一次，見囡囡坐都幾定，又爬得幾好，咁啱有個朋友上嚟食飯+探囡囡，食完飯就墊張墊放囡囡係墊上面同朋友玩。點知一放低，囡囡就好似喺床仔玩一樣不斷轉身，頭仔撞落張墊，聽到「噗一聲」，跟住爆喊，雖然有墊，但啲無情力都唔野少，撞到有啲紅紅哋。第一次撞親，潮爸同太太都未識反應，氹返囡囡後，繼續喺地下玩，太太就一定要「囡不離手」。
第二次，有位湊b高手見囡囡咁得意，就抱住囡囡周圍去玩。玩下玩下唔覺意撞親頭仔，囡囡又爆喊，潮爸及太太超級肉赤，頭仔又紅咗一撻。朋友之後勁唔好意思，太太就自己抱返。之後嗰日，諗起囡囡撞親「噗」嗰下，仲係唔知點咁，於是潮爸就即刻上網search 'baby helmet'，有cushion有膠的，最後買咗個cushion比囡囡。
一寄到嚟，潮爸即刻拆開嚟試下啱唔啱先，結果-- 係fit曬！囡囡戴住都好開心，以後喺地下玩唔駛怕撞親頭仔嘞。雖則有啲人話小朋友實會整親，跌下撞下就大個，但嗰一刻真係唔到你話唔痛，所以又係嗰句「身體髪膚」，將心比已，真的不敢+不應毀傷。
