https://www.facebook.com/babyandpapa/posts/333158090203620
笑
潮爸相信，每一個人都喜歡笑，笑，就代表着個心開左，好欣然地將東西放進去，以及好樂意地將潛在的喜悅流露出嚟。
有一次姑媽上嚟同囡囡玩，因為潮爸send咗條片在Family Group，囡囡笑到「騎騎聲」，所以姑媽同緊囡囡玩既時候就話：「我要笑到騎騎聲嗰啲！」喜歡笑嘅BB，特別逗得人家開心，繼有位小學同學的「開心BB」後，囡囡就係一個「好玩BB」，so far，各人抱住囡囡時都沒有太大抗拒。
有啲人話小朋友係點，爹哋媽咪就係點，因為小朋友會模仿care taker的表情及動作；而潮爸自覺這可能啱咗一半，因為現在有啲笑同埋喊嘅表情，潮爸都係學囡囡。還記得「港台的湊仔公節目」講過，有時BB會有負能量，而做care taker就要以正能量去化解，潮爸十分認同！小朋友越多負能量，自己就要越多正能量去幫BB化解！好多人見到BB喊，就扁曬嘴+皺曬眉：「哎喲！BB做咩呀！係咪唔開心，唔鍾意，唔高興...... 快啲笑返啦！」而潮爸通常就相反：「囡囡要開心，好多嘢玩，好多好味嘅糊仔食」BB/小朋友都未能好好控制自己情緒，分秒間喜怒哀樂形於色，所以唯有自己嘗試多做一步。首先，唔好比BB啲情緒擾亂自己；第二，唔好expect BB冇情緒；第三，在BB最容易喊嘅情況作好準備用正能量迎接。
1. BB最容易喊就係肚餓，所以潮爸每次在BB肚餓，而未嚟得切沖奶時，就算BB喊緊，都keep住笑，切忌大聲講：「得啦，唔好嘈啦！」。
2. 另外，BB眼瞓嘅時候爆喊，盡快setup好一個環境比BB瞓（抱入房掩埋門或用遮光布等BB望唔到嘢），耐心地等BB喊一陣唔好bother佢，咁就好快瞓着。
3. BB醒嘅時候又會好容易喊（可能醒咗轉咗環境、見唔到人、肚餓、心情唔靚、無安全感......）就算咩原因都好，潮爸都盡量按捺住唔即刻抱BB，在旁觀察一陣，有時會瞓返，如果持續喊就好開心入去抱起BB，然後講：「好開心呀！起咗身又有好多嘢玩啦！」跟住喺屋企行個圈，然後又笑住咁放返喺床仔度自己玩。
4. BB喊好多時都係自己喺床仔玩嘅時候撞親，囡囡瞓網床都好啲，如BB瞓木床，就算圍曬邊，由一識爬開始，就會周圍撞，又或者撞咗落自己啲玩具度。這情況要密切關注，唔係太嚴重的話，就笑曬咁用其他玩具distract番個attention同佢玩，基本上就好快冇事；但撞到紅曬就最好抱下佢，同BB講的開心嘢，搓下撞親嗰啲位，冇事後又繼續玩。
5. 當BB識轉身，轉轉下轉咗埋床邊或床角轉唔返出嚟，會勁喊；眼見到啲嘢但爬唔到去攞，又會扭計喊。潮爸有時只會當同BB玩咁係咁二幫一幫BB，將BB由床角推返出嚟，但通常都由BB自己fix一些problem又讓BB自己去調節，攞唔到個樣，就轉去玩其他嘢。
或許負能量是無形的，都是沿於BB有很多與大人一樣的心理和生理需要，而有很多生理上的limitations，但作不到適當的平衡和調節，care taker的角色，就是多用「笑+正能量」去化解負能量！希望每個BB都enjoy其童年，做個「開心BB」。