https://www.facebook.com/babyandpapa/posts/333561913496571
立如松
自從囡囡識坐之後，就不斷喺床仔開始freely咁轆來轆去，對身體的控制越來越自如。（見《坐如鐘》) 寫完那篇《坐如鐘》，估不到不到一個月就已經「立如松」。
上個月，見囡囡開始唔駛用手撐住，都可以坐得好穩陣。有一日，太太問：「唔知囡囡幾時識企？」點知之後嗰日，潮爸早上起身，就驚見囡囡個頭仔喺潮爸隔離，跟住醒咗坐起身望下囡囡，原來已經企咗喺度！BB媽咪O咗幾秒嘴，跟着醒曬，好十派咁：「囡囡好犀利呀，嚇親媽咪！」再定一定神，即刻同囡囡影張相，而囡囡就。泵完奶後就勁攬囡囡，跟住就好開心咁上班去。
潮爸都好興奮，餵完奶再瞓返。再起身嘅時候，發現床頭啲嘢跌曬落地，而囡囡張床裡面多咗好多嘢。潮爸同囡囡講：「係喎，囡囡識企呢喎，拉開啲張床先。」於是潮爸就順便執執個床頭，同埋從新處理過曬啲電線，及擺放電器用品的位置，同埋最緊要嘅係抽起一張墊褥。潮爸亦拍咗啲片Whatsapp 咗比太太，喺公司與同事分享囡囡識企，同事們都好雀躍，好開心。當天太太回家後，馬上衝入房睇囡囡，囡囡一見到媽咪就即刻用手按住個床邊，試咗幾下就企到起身，「嘻嘻嘻！」好似同媽咪講：「我識企啦！」
過咗幾個禮拜，而家囡囡已經可以自己圍住張床行；坐低咗玩，一下就起到身，兩隻手攞住公仔，爬下爬下都爬到起身；每朝一起身就企係度拍醒潮爸（當然有時拍都唔醒）。潮爸問太太：「對於囡囡識行有咩感想？」太太答道：「仲未接受到，之前仲講緊囡囡唔駛用手㩒住嚟坐，講完後幾日內已經識企，unbelievable！」
而潮爸覺得，太太所緊張的，是要接受BB突然間大個囡！未識企 = 仲要抱，仲係BB；但識企 = 已經大個，就快唔係baby，而成為小朋友toddler了！