https://www.facebook.com/babyandpapa/posts/339963029523126
聖誕聚餐
在這聖誕假期，囡囡由大個囡囡囡囡囡，突然要變返一個好細個嘅BB，著了件羊仔蛤蚧衣去同親戚朋友做冬食飯。之後又變成鱷魚仔去街街，在平安夜、聖誕夜及禮物日，再變成勁sharp鹿仔周圍去。三個造型，都氹到BB媽咪勁開心，BB媽咪又可以幫囡囡勁扮靚，呢個就係生女嘅好處。
聖誕節的早上，潮爸+太太+BB專程去玩具店一趟，買咗兩份禮物比個朋友啲小朋友。唔知大家有冇同感，小朋友越大，就越難買禮物，因為小朋友的興趣成日都變，自己都未必知道自己當下鍾意啲乜，有時買咗又未必鍾意，大人買咗買比小朋友，都係想氹佢哋開心，如果買咗唔鍾意，都幾模稜兩可。
推住囡囡入玩具店，啲sales姐姐都笑住過嚟同囡囡玩，又大讚囡囡個聖誕頭飾同埋對leggings好正。這頭飾 + leggings set，當初太太sent比潮爸交換意見嘅時候，其實潮爸唔係覺得太靚，而且只係節日先著到，唔係太合乎經濟原則，礙於太太勁鍾意就買咗。真係估唔到聖誕著出嚟+囡囡肥美嘅脾仔，會咁受歡迎，真係要比個Like！
潮爸與sales姐姐傾計，而太太就去揀禮物。朋友有一仔一女（家姐細佬），太太揀咗近期最潮嘅Frozen暖手手袋仔及型格遙控車。上年帶埋佢哋去反斗城揀禮物，所以實Ok，今年抱住囡囡唔方便，故先買後送，希望鍾意。一年一度的聖誕素食大餐，大家都期待着，因為這一年太忙了，都冇時間聚。送禮物的時間到了，仔仔很喜歡遙控車，嚷着要即刻拆嚟玩，而家姐就話「我大個女，我已經唔好Frozen啦！但都多謝呀！」跟住就show條手鍊出嚟，話知佢我而家鍾意呢啲，喺書局買好平架咋！
食完嘢，朋友啲仔女就開始同囡囡玩，潮爸有BB餅餅，餵咗兩粒比囡囡，就問佢哋食唔食，小朋友即刻反應：「我哋唔係BB嚟㗎！」朋友就話：「你哋兩個細個都成日食㗎！」跟住家姐就餵比囡囡食，餵餵下，食完一粒後自己又食一粒，然後話：「都幾好味喎！」細佬同囡囡玩玩下，突然間靜靜鷄同BB媽咪講：「其實你下次可以買BS card比我。」太太跟住O曬嘴，然後就問咩係BS card？小朋友嘅興趣真係變得好快！
Boxing Day ，潮爸爭取時間工作，而太太及囡囡就在家休息，因為晚上要去會所參加聖誕party。因為人多的關係，太太只用孭帶，唔帶BB車，去到會所，就變身成為鹿仔，影下相，同人玩下，又有得玩，又有禮物，非常盡慶！
就是這樣，囡囡就在百變形象下，開開心心咁渡過第一個聖誕節！