兄弟姐妹
潮爸現在只有一個囡，亦只湊住一個囡，身邊的人每每跟囡囡玩完，就會問潮爸幾時生第二個，跟住又話第一個係囡，第二個就會係仔！早期剛剛生完，BB媽咪傷口都未埋，大家都不停地追問幾時生第二個：「生就趁早！」「橫掂生開，快啲生多個！」當然，潮爸當然冇時間諗呢啲嘢，因為當時實在太多事情一次過擁埋嚟，少啲精神都唔得！
上年年尾去飲，碰到一個很久沒見的朋友，她又是說：「生多個陪BB玩冇咁悶。」其實呢個方案，潮爸諗咗好多年，百思不解，「生多個，對於第一個BB真係冇咁悶？」有些朋友就會等第一個大小小，再問小朋友想唔想要細佬妹，如果小朋友話唔想要，那就唔生；如果小朋友話想生個，譬如話細佬，但生出嚟係細妹，結果大嗰個就好唔鍾意細嗰個，這些case亦見唔少。
人好奇怪，每每想對每一個子女都公公平平，例如：聖誕節就買差不多價錢的禮物給每一個、每個都去學一樣樂器、send每個去同一間幼稚園、小學、中學..... 都很希望將資源平均分配給子女。但有時在給予各子女的愛，卻又在不知不覺之中，不平均地分配。有時潮爸諗或所見，（見《聖誕聚餐》）每每以為以往的平均資源分配的方式，在小朋友快速成長之中，對他們來說已經過時，亦of course不能滿足他們，所以就算資源怎樣平均分配，小朋友們總會唔滿意，甚至乎complain父母偏心，如果囡囡要多一個弟弟或妹妹，潮爸覺得就一定先要prepare自己，怎樣令到兄弟姊妹和睦，真正能做到，兄弟姊妹如手足；真正能發揮悌道地互助互愛。
可能好多人都會諗生女先，個女大啲可以幫手湊啲細佬妹。潮爸覺得都幾苦了個家姐，因為如果要一個4歳嘅小妹妹，拖住個歲半嘅細佬過馬路，或去公園玩，自己玩嘅時候又要睇住細佬，偶爾睇漏眼就要挨鬧，都幾大壓力！ 另外現代人都係教小朋友大讓細，小朋友會否覺得自己的細佬妹和自己爭寵或爭資源而感到唔開心？記得小時候都讀過「孔融讓梨」，主動地由細讓大，將那種尊重由細做起。如果將古人的說話博古通今，next generation會否又有另一番景象？
但無論道理怎樣的精妙，focus於自身，自己做好而成為sibling道中的榜樣，或許這是真切的需要吧。
