https://www.facebook.com/babyandpapa/posts/345866308932798
太太生日
上年太太生日，潮爸訂咗Four Seasons酒店內的其中一間餐廳，慶祝BB媽咪有咗囡囡後的第一個生日！幾多歲？生咗BB後，成年人年齡對於自己來說，好明顯變得不重要，總之就每年"細"一歲！那時正是換季季節，潮爸就打開衣櫃，執下啲衫，並順便搵返件飲衫，同太太+BB去食餐特別少少嘅。
若干年前，潮爸與想當年的女朋友去食candle light dinner，有朋友在Facebook留言：「突然浪漫!」如果那次是突然浪漫，那今次去四季亦算代表作！上網check咗menu及價錢，然後就打去make reservation。而家有咗囡囡，揀餐廳食飯真係要深思熟慮，餐廳太細唔得（放唔落BB車），太靜唔得（一喊就嘈親人），太擠擁唔得（要注意衛生），好多嘢要留意，而且一定會講有個手抱/坐BB車的BB，免得到時餐廳難做。那間餐廳個menu都好Ok，有好多素食，啱曬潮爸！而四季service都好好，10分鐘後即刻e-mail埋個dessert menu過嚟！
去到四季，waiter都準備咗BB凳比囡囡，但冇安全帶，所以坐唔到，waiter們即刻拉開曬啲凳比潮爸放BB車，但有點奇怪的是，我們坐的位置是在整間餐廳中間。Order咗餐，served咗麵包，囡囡突然間嗌，那潮爸當然用絕招，就係餵BB餅餅。隔咗5分鐘，經理突然過嚟請我們調位，因為怕BB嗌嘈親其他客人。當然，潮爸都冇乜所謂，因為一早都預咗坐corner位。
調咗位後，經理好醒目，擺咗另外一隻比較軟身啲嘅plain bread嚟，可以比小朋友試下，話以佢的經驗小朋友都幾鍾意食。那潮爸就say thank you，自己試咗ok，然後比少少囡囡試下。囡囡"jap jap jap"，食完笑下，勁鍾意食！坐咗大概大半粒鐘，就瞓咗，於是潮爸同太太就可以在舒適的環境下，簡簡單單咁享受中西合璧的美食。
囡囡瞓醒後，潮爸繼續餵包包。突然有個外國人（婆婆級）走過，然後said, "Oh! The baby is so cute!' 跟住就同太太傾計。傾傾下，太太就抱埋囡囡過去後面枱同婆婆及其husband玩。那潮爸亦過去跟他們打個招呼。在傾談間，知道那爺爺級是在Massachusetts 的退休 Radiologist ，僅來香港玩兩日，第二天就去內地玩。婆婆級則跟我們説他們勁恨孫，女兒在非洲做Public Health，兒子是Traveling photographer，兩個都是適婚年齡，奈何未settle down，都未打算結婚生孩子。最後跟他們拍個照，然後好不捨得囡囡咁離開。而潮爸亦問太太對於那餐生日飯滿唔滿意？另外埋單時又有另一驚喜，就係經理話剛才調位唔好意思，free咗個甜品，結果張單嘅價錢仲平過到外面的西餐食！那太太就十二分滿意，比潮爸爆Two thumbs up！
生日一年一次，諗住都係豪一次，估不到是那麼的價廉物美。開心，莫過於在簡簡單單的生活中，無限的意外驚喜吧！
