https://www.facebook.com/babyandpapa/posts/349217508597678
薑 · 續
大部分長輩都話要生產完十二朝後，BB媽咪先可以開始食薑醋補返。太太為薑醋剪彩後，潮爸落埋蛋及其他好味嘅配料，就拿拿臨準備派薑醋給親戚朋友。一來生咗BB，二來太太（食家）話好味，潮爸自然滿有自信，派出薑醋，與人家分享新生命誕生的喜悅。
呢啲情況，潮爸梗係醒目，一定搞掂外母嗰邊先，一pack pack咗兩樽5斤 （total十斤），比外母攞去派比親戚+朋友+街坊+隔離鄰舍+...... 隨她喜歡。另外5斤就派比太太公司的老闆及同事，順道以此多謝他們多年的照顧，因為要到太太放完產假先會再見。淨返5斤留比嫲嫲及其他專程到訪的親戚朋友食。咦！咁咪冇矖！當然唔係，仲有4斤係大製作之前小試牛刀做的，那就待BB媽咪慢慢享用。
其實之前已經plan好薑醋係那樣分配，所以在BB出世前一個禮拜，已經請好錫錫太太及BB嘅契媽，再訂多20斤薑及20 打台灣蛋，潮爸就再買多好多斤甜醋，準備煲第二輪薑醋。做咗第一輪薑醋，潮爸經驗值已大增，加上第二輪有BB嫲嫲幫手刨薑，一切事情都事半功倍！之前20斤薑的薑皮，風乾後已放在陰涼的地方備用，而第二輪刨咗的薑皮，多到唔夠地方風乾，潮爸只好放入焗爐風乾，䀆快放曬入密實袋收好。
一星期後，婆婆到來探BB，話啲薑醋好受歡迎，唔夠一個禮拜就派曬！婆婆説趕着要貨，可惜都無辦法，以潮爸經驗，點快都要3個禮拜先食得（但當然越耐越好味），唯有請BB婆婆等一下。其實好多親戚朋友都好想上嚟探BB媽咪、睇BB及食薑醋，但大家都好有心，唔想阻住BB媽咪休息，大家都待坐完月先上嚟，那第二輪的薑醋餚製的時間又充裕一點。嘻嘻，唔好失禮人嘛！
用薑皮沖水（熱水+薑皮），真係好香薑味，成個廚房都香，有種好新鮮的感覺！另外又買定一隻生薑洗頭水，雖然唔知有冇實質功效，但勝在都幾有薑味，後來太太洗頭時用都話幾舒服。
