變成旅客
未有潮爸之前，BB dad dad會每天在不同時間外出工作，講得普通啲就只係工作，但若美其名，都尚算在貢獻社會。但囡囡出咗世，太太放完產假後，BB dad dad 就挑戰人類極限，化身成為潮爸湊b。那Mon to Fri 的工作，就盡力地，全部安排曬喺weekends，希望BB每一天都有either Dad Dad or 媽咪全日睇住。一勞雖不能永逸，前面還有很多障礙，但可能若干年後，回憶裡就肯定會多了一個不一樣的生活片段。
將全部工作安排到weekends，其實都不太容易，因為有很多承諾要遵守，而人家確實有這樣的需要。首先要多謝各老闆都很體諒潮爸的處境，亦感謝身邊一切巧妙的安排，最終造就咗潮爸，可以full-time湊b，非常感恩！
自此之後，Weekends就成為潮爸工作及自由活動的日子。一日內要到不同的地方工作，有時坐MTR，有時坐巴士，轉下轉下，後來全部都可以坐地鐵直達！那太太就提醒：「不如買全日通，慳返啲！」潮爸計過條數，買全日通可以慳到廿幾卅十蚊一日，少數怕長計，都唔錯。
第一天落地鐵站買「全日通」，職員姐姐答道：「有呀！全月通！一個月有效。」潮爸再問：「係全日通。」職員姐姐再答：「係呀！全月通嘛！」那潮爸就只有再解釋：「我係想買一日來回可以任搭嗰隻。」那職員姐姐有點愕然：「$55蚊呀。入閘拍咭，出閘插咭。」買到車票，就趕住返工。潮爸諗極都唔明，點解要「入閘拍咭，出閘插咭」，but anyway，有得用就用。晚上返到屋企，先攞張全日通出嚟仔細望下。啊！原來上面寫住「成人旅客全日通」。唔怪得職員姐姐那麼的愕然，原來是不相信操流利廣東話的潮爸，在決定湊b後，不知不覺之間，已經成為了旅客......進入了萬物之逆旅......
