https://www.facebook.com/babyandpapa/posts/352452738274155
BB展Shopping
首先多謝有讀者提醒潮爸，在這流感高峰期，到人多的地方要加倍注意！
去得這些要準備血拼的地方，冇可能一時三刻出得返嚟，睇下嘢，排下隊，講下價，傾下計，買下嘢，比下錢，等下電梯.....一兩個鐘閒閒地。故此，潮爸就同囡囡喺屋企瞓夠食夠先出嚟，一來瞓夠精神好啲，抵抗力好啲，二來唔駛帶奶出街餵。另外帶定孭帶，如果人太多就摺起BB車孭囡囡，免得費時失事。
太太請咗半日假，所以潮爸在中午過後才出發。到咗灣仔，已經周圍都係BB車！諗住搭地鐵站裡的電梯上去，但已有十幾架BB車等緊（唔係誇張，可能等廿分䭚先上到去路面）！潮爸及太太就即刻轉陣，孭起囡囡及摺起BB車，搭電梯上去，兩分鐘就上到地面。在去會展途中，見到好多人拉住大大細細嘅喼，那必定係BB展掃貨！潮爸心諗，希望不要多人到水洩不通。
去到門口，就見到抽獎箱，唔好講笑，即刻填咗啲資料抽獎先。一入到去，very nice，可能係平日，唔算好多人，推住BB車，在會場內都迎刃有餘，除咗一啲特別多人排隊嘅booths，都行得ok自如。奶粉公司預期地霸曬出入口位置，囡囡都快一歲，就嚟都唔洗食奶粉，太太問排唔排隊攞samples，潮爸話不如爭取時間睇下有冇好嘢或「新奇剌激」嘅嘢。
第一間潮爸有興趣嘅booth，係賣腰間有個坐位比BB坐嘅孭帶。在街上看見好多人用，於是就去試下。Sales姐姐好好招呼，幫潮爸試孭帶上身。大家有睇潮爸都知，潮爸係用緊BabyBjorn 嘅孭帶，之前都試過其他牌子，但都覺得Babybjorn最好用。貼身以及將BB重量平均分配在兩邊膊頭，好似孭背囊咁。而這有坐位的孭帶，大部份嘅力都係喺曬條腰度，膊頭的strap只是輔助作用，沒有好貼身的感覺。潮爸估計，長期用或BB越來越重的時候，孭得耐條腰可能會否比較攰。另外，曾經見過一些媽咪用，小朋友的個子比較高的話，小朋友坐在腰間的坐位時頭會遮住媽咪視缐，好像有點不安全，嗲哋用可能就沒有這個問題。唔知有冇人用過可以分享一下？
試完孭帶，對面有架MINI嘅BB車，其實個款潮爸都Ok鍾意，但摺車比較複雜及車身都係比較重，太太就冇辦法用，所以試完就走咗。之後都試過幾隻牌子嘅BB車，唔係價錢唔啱，就又係太重，若買架新車比囡囡，都真要重詳計議。在場有好多有機食品及攪拌機。攪拌機潮爸都已經有，那便去試下BB食嘅餅仔。唔......都係依家食開嗰隻好味啲！另外catch到潮爸attention嘅就係baby gym同baby spa，同Sales哥哥傾咗幾句，都覺得baby gym可以去試下；而baby spa，其實之前都book咗年三十晏晝去，但BB展買coupon平啲，慳咗差不多20-30%，Why not?
