脾氣
每個人都有脾氣，有啲人日日都爆，仲要爆極都有，好好火，好大壓力，躁底；有啲人鍾意「爆」，爆完好快就冇事，爆竹頸；有啲人會盡量忍，忍唔掂，迫不得已先爆；有啲人忍住唔發脾氣，點都忍，忍無可忍都忍！
一般人都話BB越大個係越易湊，理據或者都是歸於：BB大個咗，抵抗力好咗，實淨啲無咁容易整親，開始識表達等 -- 心理上擔心少咗；但另一方面：BB大個咗，開始識行識走，要多啲attention，精力越來越旺盛要放電，用多咗時間去煮糊仔粥仔 -- 體力勞動多咗！
光陰似箭，囡囡現在已十一個月，在這段湊b的日子裡，真係學咗好多嘢。由沖奶-->抱B手勢-->整糊仔-->出街街-->......... 在照顧上，都循序漸進地，一步一步增進技巧，累積經驗，雖然前一陣子突然感到有些疲倦，但爭取返一些時間休息後，體力恢復得很快。而從無間斷地衝撃着的，就是內在間歇起伏不斷的脾氣。現在仍然不斷感恩，囡囡已好錫潮爸及BB媽咪，已經唔係成日喊，喊到心都煩埋個隻，有空間給潮爸整理思維，還有力量寫《潮爸湊b日誌》，真的Thx Thx！
其實湊咗b之後，發覺到有很多事情，都會觸動到情緒，大至BB發燒，微細至一個半個反應，都可能令到發脾氣，真需要極大的能量去按捺及平復，感覺真的像自己在上情緒管理的專業課程，而導師就係「囡囡」！追溯最早就是BB初生時，幫BB沖涼，唔知點解無啦啦喊。有啲人好理想化話BB沖涼好開心，唔會喊！潮爸真的可以講句：「唔好玩啦！邊有咁完美。日日都沖涼洗頭，總有日心情唔靚，水整到眼，鼻或口，或搽咗皂唔覺意㧥手，或各樣會令到BB沖涼喊。」當時唔係好熟手，外母又「旁觀者+依牙鬆鋼」，真係幾大壓力，幸好有少少功力頂住，按捺脾氣，順利通關。
之後其實好多時都可以從喊聲（見《喊聲 · 呀嘩唔呀》），但總有啲時候係估唔到，瞓咗覺食完嘢去完街玩完又唔熱又唔凍又唔焗又唔嘈又唔靜...... 已經喺一個好peaceful嘅世界，都喊，真係有啲脾氣：「攪咩呀？」另外，還記得寫完《喊聲 · 呀嘩唔呀》之後，帶囡囡同朋友食飯，囡囡玩玩下唔知點解唔制，朋友好不容氣即刻challenge：「又話識分喊聲，你個女扭咩呀？」沒有辦法，潮爸只好答：「唔知！」
