https://www.facebook.com/babyandpapa/posts/366015260251236
打針針 again
囡囡剛打完一歲的針，一共打三支，真係「BB最痛」！
打針之前潮爸問太太有冇請假，太太話請咗半日，潮爸道：「打咗幾次針，我自己孭囡囡咪得囉。」太太點都唔肯，話一定要去，像非要和囡囡共同進退不可。潮爸唔想太太去係因為太太最近病病哋，又撞正流感高峰期，聽到囡囡打針嘅時候喊自己又會爆喊，但既然BB媽咪咁勇敢，那就一去高興啲。
那天是下晝打針，早上潮爸等囡囡瞓晏啲，餵一餐粥仔後就出發。雖然打針前兩日已經同囡囡講咗去打針，但去母嬰健康院途中，仍然同囡囡講：「一陣打針針針（3支）要叻叻！」根據預約時間到達母嬰健康院，已經有好多個B等緊打針。量咗身高體重，一切正常，weight and height ratio仍然是50%ile，BB媽咪非常自豪！磅完出去繼續等，那裡有個遊樂場仔，囡囡識爬及識行幾步，本來可以玩下，但剛巧正在維修，所以就齋等。等等下，等到囡囡都瞓咗。
等咗差不多1小時45分鐘，終於到囡囡。入去之前除定長褲仔，show對肥美嘅脾仔出嚟。潮爸跟上次打針一樣，一路唱住：「打針針，好開心。」一路走進入打針室。護士姐姐們聽到潮爸唱「打針針，就即刻話：「邊有爸爸咁樂觀？打針都開心？」又道：「幫啲小朋友打針，啲小朋友好憎我㗎！」今次一針打左脾，兩針打右脾。潮爸等太太攞咗藥單，行咗出去，先慢慢㩒實囡囡個大脾，等太太有足夠時間逃離現場。第一針打落去，即刻扁曬咀；第二針打落去，囡囡知唔對路即刻爆喊！那護士就快快手打埋等三支。整個過程潮爸都唱住「打針針....」，但都掩蓋唔到囡囡淒厲嘅喊聲。囡囡越大，打針的反應一定越大，所以潮爸就必須更加定，等囡囡更有安全感。爆喊聲中韻含著嗲嗲聲，在hallway都一路講住Happy vaccination。BB媽咪剛攞完藥上返嚟，囡囡就收咗聲，好叻叻！
返到屋企，又係準備探熱針，每小時探一次熱。今次打完針冇好似上次咁成個謝曬，照樣玩同食奶，不過好明顯嗲嗲咗，要抱抱。到咗半夜，囡囡開始㷫，但又未真係燒，只係成身汗。於是拿拿臨抹身換衫，但之後就一路瞓得唔好，輾轉反側，成晚都嗌住，貼咗退熱貼，但又搣返落嚟，結果潮爸成晚冇得瞓。第二日起身有少少燒，食咗藥，好啲，但都見囡囡唔係好舒服...... 最終，兩晚都冇乜點瞓......
