https://www.facebook.com/babyandpapa/posts/372513502934745
陪月 （第一課）
這陪月課程，是十個星期，而每星期上一課，每課節為2.5小時。第一日在地鐵站與BB媽咪交收囡囡，有點兒緊張，因為怕BB媽咪突然要OT或遇到甚麼阻滯而遲到，幸好一切順利。
一入到班房，已坐滿人（全女班），只餘下一個在最後排角落的位置，潮爸一貫上堂都唔係柄埋一邊嗰啲，但今次唔同，潮爸心諗：「啱曬！得一個男生，唔好咁揚。」潮爸一坐低，份notes已放在枱上，並且有個schedule。整個課程主要是由一位資深助產士授課，其中有一堂會有一位中醫講解坐月知識、有一堂係陪月師姐教授坐月食療，另外有一位資深陪月顧問研究面試技巧，潮爸睇完都覺得幾ok，同埋都幾organise，讀完真係可以出去「搵食」！
助產士一開波就問同學仔們為何要來上這個陪月課程，有些婆婆級就話自己的女兒剛懷孕，說當年都是「乜都唔識」就養大咗個女，現在想學一些新的知識待將來BB出世都可以幫下手；有些大肚媽媽就當然是想學定等BB出世自己湊；有些則聽聞陪月有市場+「好搵」，想轉行；而只得潮爸一個男生，助產士就即刻問潮爸為何報課程？潮爸都說笑道：「想轉行！」大家就覺得好攪笑！跟着助產士再問潮爸有沒有湊b經驗，那潮爸就滿有信心+沾沾自喜地答：「有一個囡囡，自己湊！」助產士：「那你就應該好熟手！」潮爸再續說：「其實想學返套正統的湊b技巧，以及希望在課程及大家的分享中學習一下。」
助產士介紹完自己，因為課程緊迫，就馬上開始！
這證書課程開宗明義係「搵工」，所以就馬上教授作為陪月員的角色（見下圖），之後就先講講孕期前中後的要點。懷孕初期為第1至3個月，大部分人都不會講，人家大都説「怕BB小器」，但其實真的是有很多害喜現象（例如：作嘔），在medical立場，胎兒都不太穩定，所以不講都是正常。到懷孕中期（第4至7個月），胎兒穩定成長，孕婦要吸收更多營養。第三期是第8至10個月的懷孕後期，胎兒而成形而孕婦開始行動不便。
懷孕期的生理轉變，表面上是：凸肚、乳房變大、有肚紋、體重增加、（有些人）嗅覺特別敏感，有媽咪甚至口味完全改變，其實是對BB的保護。有些準媽媽馬上回應：「係呀！完全轉曬！食魚即嘔！」而有些媽咪則有其他反應。潮爸回想起太太有BB的時候，就轉曬全西餐，隔日潮爸就煮意粉（白汁 or 茄汁 or 黑松露 or 香草醬）+ low fat or oil-free 忌廉湯給太太吃，每日都要食西柚，另外潮爸就整了一些「酸子薑」等太太當snack食，懷孕到3-4個月，都無酸不歡，那潮爸就不停供應，所以太太（Thx God）冇乜點嘔過。
今日清潔雪櫃，原來還餘下幾舊酸子薑，食返兩舊先，醃咗差不多兩年，正！
